16 390 000 ₸-ден бастап

1. Жалпы ережелер

1.1. Осы Қағидалар «Geely China Experience» ұтыс ойынын (бұдан әрі – «Ұтыс ойыны») өткізу тәртібін айқындайды.

1.2. Ұтыс ойынын ұйымдастырушы G Motors Kazakhstan (бұдан әрі – «Ұйымдастырушы») болып табылады.

1.3. Ұтыс ойыны New Monjaro автокөлігіне алдын ала тапсырыс беру бағдарламасы аясында өткізіледі.

1.4. Ұтыс ойыны New Monjaro автокөлігі мен Geely брендін ілгерілетуге бағытталған ынталандырушы жарнамалық акция болып табылады және Қазақстан Республикасының заңнамасына сәйкес лотерея, құмар ойын, бәстесу, тотализатор немесе тәуекелге негізделген өзге де ойын болып табылмайды.

2. Өткізу мерзімдері

2.1. Алдын ала тапсырыс беру кезеңі: 2026 жылғы 29 маусымнан 7 шілдеге дейін (қоса алғанда).

2.2. Ұтыс ойыны өткізілетін күн мен уақыт Geely Kazakhstan компаниясының ресми ақпараттық ресурстарында жарияланады.

3. Қатысу шарттары

3.1. Ұтыс ойынына Қазақстан Республикасының азаматтары болып табылатын, әрекетке қабілетті, 18 (он сегіз) жасқа толған, Қазақстан Республикасындағы Geely компаниясының ресми дилерінен белгіленген мерзімде New Monjaro автокөлігіне алдын ала тапсырыс берген, кейіннен 2026 жылғы шығарылған New Monjaro автокөлігін сатып алған және сатып алу-сату шарты бойынша өз міндеттемелерін толық орындаған жеке тұлғалар қатыса алады.

3.2. Ұтыс ойынына қатысу үшін:

• 2026 жылғы 29 маусым мен 7 шілде аралығында (қоса алғанда) New Monjaro автокөлігіне алдын ала тапсырыс беру;
• алдын ала тапсырыс берген алғашқы 100 клиенттің қатарына кіру;
• New Monjaro автокөлігін сатып алып, сатып алу-сату шартының талаптарын толық орындау қажет.

3.3. Қатысушылардың кезектілігі Ұйымдастырушының және (немесе) Geely компаниясының ресми дилерінің есепке алу жүйесінде тіркелген алдын ала тапсырысты нақты рәсімдеу күні мен уақытына қарай, кейіннен 2026 жылғы шығарылған New Monjaro автокөлігін сатып алу және сатып алу-сату шартының талаптарын толық орындау шартымен айқындалады.

Техникалық ақаулар туындаған жағдайда Ұйымдастырушы қатысуды растайтын құжаттарды, оның ішінде өтінімді, шартты, төлем құжатын, кассалық чекті, банк үзіндісін және (немесе) өзге де есептік деректерді пайдалануға құқылы.

3.4. Алдын ала тапсырыс бергенімен, автокөлікті сатып алу рәсімін аяқтамаған клиенттер Ұтыс ойынына қатыстырылмайды.

3.5. Ұтыс ойынына қатысу үшін қосымша тіркелу талап етілмейді. Осы Қағидалардың талаптары орындалған жағдайда қатысушы автоматты түрде Ұтыс ойынына қатысушылар тізіміне енгізіледі.

3.6. Ұтыс ойынына қатыса отырып, қатысушы Ұйымдастырушыға Ұтыс ойынын өткізуге, Бас жүлде иелерін айқындауға, сапарды ұйымдастыруға, сондай-ақ Қазақстан Республикасы заңнамасының талаптарын орындауға қажетті көлемде өзінің дербес деректерін жинауға, өңдеуге, сақтауға және пайдалануға келісім береді.

Geely China Experience бағдарламасына қатысу шарттары

3.7. Бас жүлдені қабылдай отырып, Бас жүлде иесі сапар барысында фото-, бейне- және аудиотүсірілім жүргізуге келісім береді, сондай-ақ Қазақстан Республикасының заңнамасында өзгеше көзделмесе, Ұйымдастырушыға өзінің бейнесі бар материалдарды ақпараттық, жарнамалық және маркетингтік мақсаттарда қосымша сыйақы төлемей пайдалануға құқық береді.

3.8. Егер Бас жүлде иесі фото- немесе бейнетүсірілімге қатысудан бас тартса, Ұйымдастырушы оның Бас жүлдені алу құқығын жоюға және қайта ұтыс ойынын өткізу арқылы жаңа Бас жүлде иесін айқындауға құқылы.

3.9. Бас жүлде иесі сапар бағдарламасын, бекітілген іс-шаралар кестесін, қауіпсіздік талаптарын, сондай-ақ Ұйымдастырушы мен қабылдаушы тарап өкілдерінің заңды талаптарын сақтауға міндетті.

3.10. Бағдарламада көзделген барлық іс-шараларға қатысу міндетті болып табылады. Іс-шараларға қатыспауға тек құжатпен расталған немесе Ұйымдастырушы негізді деп таныған дәлелді себептер болған жағдайда ғана (мысалы, ауру, жазатайым оқиға немесе еңсерілмейтін күш мән-жайлары) жол беріледі.

3.11. Бас жүлде иесі қоғамдық тәртіп нормаларын сақтауға, бағдарламаның басқа қатысушыларына, Ұйымдастырушы мен қабылдаушы тараптың өкілдеріне құрметпен қарауға, сондай-ақ Geely брендінің беделіне нұқсан келтіруі мүмкін әрекеттер жасамауға міндетті.

3.12. Сапар бағдарламасын, қоғамдық тәртіпті, қауіпсіздік талаптарын, болатын елдің заңнамасын өрескел бұзған, агрессивті мінез-құлық танытқан, тыйым салынған заттарды пайдаланған немесе бағдарламаның өткізілуіне кедергі келтіретін өзге де әрекеттер жасаған жағдайда, Ұйымдастырушы Бас жүлде иесінің Geely China Experience бағдарламасына қатысуын ешқандай өтемақы төлеместен тоқтатуға құқылы.

3.13. Егер Бас жүлде иесінің әрекеттері салдарынан Ұйымдастырушы қосымша шығындарға, айыппұлдарға, залалдарға немесе өзге де шығыстарға ұшыраса, Бас жүлде иесі Қазақстан Республикасының заңнамасында көзделген тәртіппен мұндай шығындардың орнын толтыруға міндетті.

4. Ұтыс ойынын өткізу тәртібі және Бас жүлде иелерін айқындау

4.1. Осы Қағидалардың барлық талаптарын орындаған тұлғалар Ұтыс ойынына қатысуға жіберіледі.

4.2. Ұтыс ойыны өткізілгенге дейін Ұйымдастырушы қатысуға жіберілген қатысушылардың тізімін қалыптастырып, оны Geely Kazakhstan компаниясының ресми сайтында жариялайды.
Қатысушылар тізімі дербес деректердің жария етілуіне жол бермейтін иесіздендірілген (обезличенные) деректерді пайдалану арқылы немесе Қазақстан Республикасының дербес деректер және оларды қорғау туралы заңнамасының талаптарына сәйкес өзге тәсілмен жарияланады (мысалы, қатысушының аты, тегінің бірінші әрпі, ішінара жасырылған телефон нөмірі, қатысушыға берілген нөмір немесе өзге сәйкестендіргіш көрсетілуі мүмкін).

4.3. Ұтыс ойыны @geelykz ресми Instagram парақшасында тікелей эфирде лототронды пайдалану арқылы өткізіледі.

4.4. Тікелей эфир барысында жүргізуші лототроннан тиісті нөмірлерді (немесе қатысушылардың өзге де сәйкестендіргіштерін) кездейсоқ таңдау арқылы үш Бас жүлде иесін айқындайды.

4.5. Әрбір Бас жүлде иесі анықталғаннан кейін Ұйымдастырушы алдын ала тапсырыс беру кезінде қатысушы көрсеткен телефон нөміріне қоңырау шалады.

4.6. Егер қатысушы тікелей эфир барысында қатарынан жасалған үш телефон қоңырауына жауап бермесе, ол Бас жүлдені алу құқығынан айырылады. Мұндай жағдайда Ұйымдастырушы қайта ұтыс ойынын өткізу арқылы жаңа Бас жүлде иесін айқындайды.

5. Бас жүлде және оны алу тәртібі

5.1. Бас жүлдеге мыналар кіреді:

• Алматы – Ханчжоу – Алматы бағыты бойынша әуе билеттері;
• бағдарлама кезеңіндегі тұру;
• күніне үш мезгіл тамақтану;
• бекітілген іс-шаралар бағдарламасына сәйкес көлікпен қамтамасыз ету.

Осы тармақта көзделмеген өзге де шығыстарды Бас жүлде иесі дербес төлейді.

5.2. Бас жүлде ақшалай баламасына айырбастауға, үшінші тұлғаларға беруге, сатуға, басқаға табыстауға немесе өзге жүлдеге ауыстыруға жатпайды.

5.3. Сапарды ресімдеу үшін Бас жүлде иесі Ұйымдастырушыға жарамды шетелдік паспортты және сапарды ұйымдастыру үшін қажетті өзге де құжаттарды қоса алғанда, барлық қажетті құжаттарды ұсынуға міндетті.

5.4. Құжаттар Ұйымдастырушыдан хабарлама алынған күннен бастап 3 (үш) күнтізбелік күн ішінде ұсынылуға тиіс.

5.5. Құжаттар белгіленген мерзімде ұсынылмаған, анық емес немесе жалған мәліметтер ұсынылған не Бас жүлдені алудан бас тартылған жағдайда, Ұйымдастырушы Бас жүлдені алу құқығын жоюға және қайта ұтыс ойынын өткізу арқылы жаңа Бас жүлде иесін айқындауға құқылы.

5.6. Егер бұл Geely China Experience бағдарламасының талаптарында көзделген болса, Бас жүлде иесі сапарға өзімен бірге еріп жүретін адамды алып қатысуға құқылы.

5.7. Еріп жүретін адам әрекетке қабілетті, 18 (он сегіз) жасқа толған жеке тұлға болуы, жарамды шетелдік паспорты мен сапарға қажетті өзге де құжаттары болуы, дербес деректерді жинауға және өңдеуге, дербес деректерді трансшекаралық беруге, фото-, бейне- және аудиотүсірілім жүргізуге келісім беруі, сондай-ақ осы Қағидалар мен сапар бағдарламасының талаптарын сақтауы тиіс.

5.8. Еріп жүретін адамның осы Қағидаларды немесе сапар бағдарламасын бұзуы Бас жүлде иесінің бұзушылығына теңестіріледі және осы Қағидаларда көзделген салдарға әкеп соғуы мүмкін.

5.9. Geely China Experience бағдарламасына кіретін әуе тасымалын, тұруды, тамақтануды, көлікпен қамтамасыз етуді және өзге де қызметтерді ұйымдастыруды Ұйымдастырушы үшінші тұлғаларды, оның ішінде лицензиясы бар туроператорды және (немесе) турагентті, әуе тасымалдаушыларын, қонақ үйлерді, көлік ұйымдарын және қабылдаушы тарапты тарта отырып жүзеге асыруы мүмкін.

Ұйымдастырушы туроператор болып табылмайды және туристік қызметтерді дербес көрсетпейді. Тиісті қызметтердің сапасы мен қауіпсіздігі үшін Қазақстан Республикасының заңнамасында және жасалған шарттарда белгіленген шектерде мұндай қызметтерді тікелей көрсететін тұлғалар жауапты болады.

6. Қорытынды ережелер

6.1. Ұтыс ойынына қатыса отырып, қатысушы осы Қағидалармен танысқанын, олардың мазмұнын толық түсінетінін және оларды сақтауға келісетінін растайды.

6.2. Ұйымдастырушы осы Қағидаларға өзгерістер енгізуге құқылы, мұндай өзгерістер қатысу талаптарын орындаған қатысушылардың құқықтық жағдайын нашарлатпауға және Бас жүлде иелері айқындалғаннан кейін оларға қолданылмауға тиіс. Бұл талап Қазақстан Республикасы заңнамасының талаптарына, еңсерілмейтін күш мән-жайларына (форс-мажор) немесе Ұйымдастырушыға тәуелді емес өзге де жағдайларға байланысты енгізілетін өзгерістерге қолданылмайды.

6.3. Қазақстан Республикасының қолданыстағы заңнамасына сәйкес Ұйымдастырушының Ұтыс ойынын өткізуге, Бас жүлде иелерін айқындауға және осы Қағидалардың сақталуына қатысты қабылдаған шешімдері түпкілікті болып табылады.

6.4. Ұйымдастырушы қатысушының дұрыс емес немесе толық емес байланыс деректерін ұсынуы салдарынан, сондай-ақ Ұйымдастырушыға тәуелді емес себептер бойынша Ұтыс ойынына қатысу немесе Бас жүлдені алу мүмкін болмағаны үшін жауапты болмайды.

6.5. Еңсерілмейтін күш мән-жайлары (форс-мажор), сондай-ақ Ұйымдастырушыға тәуелді емес және Ұтыс ойынын өткізуге немесе Geely China Experience бағдарламасын іске асыруға кедергі келтіретін өзге де жағдайлар туындаған кезде Ұйымдастырушы қатысушыларды Geely Kazakhstan компаниясының ресми ақпараттық ресурстары арқылы хабардар ете отырып, Ұтыс ойынын өткізу мерзімдерін, тәртібін өзгертуге немесе сапардың күндерін ауыстыруға құқылы.

Қатысушылар тізімі